ზღაპრები უხსოვარი დროიდან არსებობს. მათ თაობიდან თაობას ზეპირსიტყვიერების გზით გადასცემდნენ. ხალხი იმახსოვრებდა გასართობ და შემეცნებით, სერიოზულ და მხიარულ ჯადოსნურ ამბებს. ზღაპარი მოგზაურობდა მთხრობლიდან მთხრობლამდე, ერთი ტერიტორიიდან – მეორემდე და დროთა განმავლობაში იცვლებოდა მისი შინაარსი. შარლ პეროს ზღაპრების ამ კრებულში შესულია ისეთი ცნობილი ზღაპრები, რომელთა გარეშეც წარმოუდგენელია ნებისმიერი ჩვენგანის ბავშვობა. ფრანგი მეზღაპრე ზეპირსიტყვაობაში არსებულ ზღაპრებს ამუშავებდა და წერილობით ფორმას აძლევდა. მისი რამდენიმე ცნობილი ზღაპარი გერმანელი მეზღაპრეების, ძმები გრიმების შემოქმედებაშიც გვხვდება ზუსტად იგივე სათაურით. ეს კიდევ ერთხელ ადასტურებს იმ ფაქტს, რომ მათ შემოქმედებაში დიდია ხალხური ზეპირსიტყვიერების გავლენა.
