ეს წიგნი საქართველოს დიდი წარსულის მოკრძალებული, მაგრამ სიყვარულით გაჯერებული, მცირე ისტორიაა. ვეცადე გადმომეცა გაბმული თხრობა ქართველი ერის მრავალსაუკუნოვანი არსებობისა, თავგანწირული ბრძოლისა თავის გადარჩენისათვის, თავისუფალი, ღირსეული ცხოვრებისათვის, რადგანაც საქართველოს, კავკასიის გეოპოლიტიკური მნიშვნელობის გამო, ყოველთვის მძლავრი იმპერიები უპირისპირდებოდნენ. მიუხედავად ამისა, განსაცვიფრებელია, რომ ქართველებმა შექმნეს, და რაც მთავარია, შეინარჩუნეს ორიგინალური, მრავალმხრივ გამორჩეული კულტურა. ვეცადე ისიც ამეხსნა მოზარდებისათვის, რომ მოღალატეებისა და ქვეგამხედვარების გვერდით მრავლად იყვნენ ჭეშმარიტი მამულიშვილები, ქვეყნისა და ერის თავდადებული შვილები. ჩემი მიზანი იყო ქართველი ერის ჭეშმარიტი გმირული წარსულის და არა ვაება-გოდების ყალბი ისტორიის გადმოცემა, რასაც უფრო თვალსაჩინოს ხდის ჩვენი უმდიდრესი კულ-ტურული მემკვიდრეობის ილუსტრაციები.
